【分享】海高斯夢遊酒莊
前幾日打風，小編一手炒起部電話，好決絕咁按熄咗個鬧鐘，用一副睡眼惺忪嘅樣望一望部手機。一望之下，竟然睇到通知個欄彈出咗一句「八號烈風或暴風信號」現正生效。嘩！我即刻碌大眼睇清楚啲，真係打八號喎，係咁強大嘅力場之下都會有八號。然後跟手就熄曬隨下落嚟嘅10個鬧鐘……
可以瞓番個回籠覺真係好幸福，期間我發咗個夢……
我變咗做西班牙一間酒莊嘅酒農，坐咗係個yard度，望住一大片我嘅寶貝葡萄樹好無助咁比雨揼緊，然後颶風好無情咁掌摑緊佢地。心痛死我喇，咁落雨法，真係喊都無謂。
雖然話葡萄園嘅田一般都係比較疏水，唔容易有積水，但太多嘅雨水一時間排唔走，葡萄樹就會好貪婪咁吸曬啲水。一旦佢地吸得太多水，啲果實就會有好多水分，令到佢地嘅糖含量太少，味道都會變得好淡。釀製嘅時候就會令到成支酒變得好平淡，無曬風味同變化，口感亦都會變得唔醇正。
不過人就好矛盾，太多雨唔得，太少雨亦都唔得。如果種植期間天氣太炎熱、乾旱，又會搞到葡萄樹生長得太快，令到佢風味唔夠細緻，又唔夠酸度，出產唔到一啲高質酒。
今年收成都睇嚟凍過水喇，唯有睇下個質素會唔會變得太差，如果唔太壞，都可以用嚟做我地嘅副牌酒嘅。平啲出售，都好過渣都冇。
突然一個閃電令我打咗個激靈，即刻張開眼睇下咩事啦，原來係媽子開我間房嘅燈問我做乜仲唔起身，起喇起喇。
唔怪得酒友成日都好在意好年同唔好年啦。其實懶人如我都係會參考下呢個網站: https://www.robertparker.com/resources/vintage-chart睇下產區唔同嘅年份值唔值得買嚟飲。打風對於打工仔嚟講係幾開心，不過對於酒農嚟講就唔係好事喇！
Scarlett - 21 August 2020