【專題】Celebrate Champagne Day Together
歐洲第二波疫情殺到，包括法國在內，多個國家實施宵禁！不過，2020年新常態！#stayathome一樣可以同全世界慶祝#ChampagneDay！咁啱香檳日黎到第十一年，11週年就試下新野，線上線下活動同樣活躍！
長氣都要講一句：只有係法國香檳區生產既先叫Champagne香檳，其他法國地區出產既都只可以叫做Cremant sparkling wine法國氣泡酒。唔洗問，其他國家生產既就更加冇可能叫Champagne香檳啦～～～！其他國家指定地區釀製既氣泡酒會有唔同名：西班牙Cava區生產叫Cava卡瓦氣泡酒，意大利Prosecco區生產叫普羅賽克氣泡酒。
香檳日當然要玩玩新意思，等小編俾3個意想不到既玩法你啦～～～！
- DIY香檳樽燈
全球都講緊要節能減廢低碳，多左時間係屋企，就試下DIY自家香檳樽燈！好多香檳酒莊都會出特別版：Chapuy X 神之水滴出左聖誕特別版，Moët & Chandon有Ice Impérial版，相當吸睛！攞特別版去回收有D浪費。可以試下去IKEA買吊燈電線套裝，將酒樽變燈罩。或者網購座檯燈，直接酒樽變燈座。簡簡單單，去深水埗買幾條LED燈放入酒樽。DIY香檳樽燈又環保又有情調，小編屋企細細，用375ml香檳樽，細細支放係納米樓就啱啱好～ - 創意Champagne Food Pairing
一般香檳真係幾乎咩場合都啱飲，不過所謂咩場合都係好西式既派對或Dining。香港中西文化大熔爐，靈活既Hongkonger當然要食好西配美酒！講嘢最緊要有牙力，食野就係要有食力！粉紅香檳比一般香檳重單寧味，食中式鹽焗蝦可以配Rose玫瑰香檳就一流。Blanc de Blanc白中白香檳散發優雅花香，配清新越南米紙卷就最啱key！Blanc de Noirs黑中白香檳比較少見，可以配同樣少見A5神戶牛、松阪牛同近江牛肉刺身，紅葡萄釀既白香檳，帶獨特紅色、黑色漿果香氣混合雪花和牛，櫻花在舌尖盛放！！！甜食愛好者可以飲比一般香檳更甜既Demi-Sec，甚至係Doux，搭韓國煎餅，感覺似泫雅一樣又甜又辣好複雜～！ - 香檳Soufflé Pancake
打卡必食Soufflé Pancake！小編今次整香檳梳乎厘班戟～！先準備雞蛋4隻、牛奶40ml、砂糖40g、低筋麵粉60g、少量香檳。
步驟： 1）分開蛋白蛋黃
2）蛋黃加入牛奶混合 ，再加入低筋麵粉混合
3）蛋白分三次加入砂糖發打至企身，形成蛋白霜
4）將1/3蛋白霜放入蛋黃麵糊輕輕拌勻，然後將混合物倒入蛋白霜輕輕拌勻，最後加入少量香檳拌勻
5）中小火燒熱鍋，抹上一層油，麵糊每件要加兩至三層
6）轉為小火加蓋煎焗約8分鐘，反轉班戟，繼續煎焗約8分鐘
7）完成～