By Scarlett. C

今年大家都辛苦喇, 近排政府宣佈咗又要六點後禁堂食，大家都係乖乖地留係屋企罷啦！係聖誕節之前，仲有一樣野叫冬至大過年，下星期一就係冬至啦。我諗大家可能同小編一樣，都覺得今年冇乜過節氣氛。不如襯呢個時候，同屋企人係屋企食餐好啦。

華人嘅節日，當然會食翻中菜，但咁唔代表唔可以配到葡萄酒。好似之前有篇講婚宴酒提到，其實中菜都可以配到酒。小編係冬至嘅時候，都會例牌叫盆菜，貪佢翻熱就食得，又可以熱住食。有平有貴，豐儉由人。一般係上層都係啲比較明貴嘅食材，鮑魚，鵝掌，花膠之類，中下層就會係啲比較平民嘅食材，冬菇，白蘿蔔等吸味嘅食材，所以講到最後，小編都係覺得都係食個汁。一般嚟講個汁都係比較油膩，小編會用翻啲酸度比較高嘅紅酒配佢，中和口入面嘅油膩感。

第一支我會簡意大利Barolo，有酒友話佢係一支「三高」酒，高單寧；高酒體；高酸度，配啲濃味，油膩嘅野食實走唔甩。靚嘅Barolo會有啲甘草，薄荷，煙燻味，飲開紅酒嘅都會飲到好滋味，因為佢比到好實淨，完整嘅結構你，口感上會有好豐富嘅味道。

不過家庭聚會我都會選擇一啲大家容易接受啲嘅酒，所以第二支我會簡Burgundy Pinot Noir. 你冇睇錯，呢兩支酒嘅風格簡直係風馬牛不相及。係紅酒嘅世界入面，冇一個確實嘅方程式話比你知咩菜式配咩酒，就好似人生咁，不斷嘗試，先知你想要嘅係咩。其實呢兩酒，佢地都有共通點嘅，就係酸度都比較強，可以中和盆菜嘅酒膩感。另外Pinot Noir 嘅單寧會比較輕身，就算平時唔太飲酒嘅朋加友，都會接受得到。加上低單寧嘅特點唔會令佢同啲汁相沖。佢嘅味道大部份都係偏向果香，士多啤梨，車里子，紅桑子之類，其他仲會帶少少香草，香茹味。所以中菜入面餉啲燒鴨，冬菇燘鵝掌之類其實兩者係好夾。

祝你今年有個平平安安嘅冬至同聖誕節！